Դիլիջան, ՀՀ

Դիլիջանը քաղաք է Հայաստանի Հանրապետության Տավուշի մարզում։ Հեռավորությունը Երևանից` 99 կմ: Համարվում է քաղաք-առողջարան։ Դիլիջանի տարածքում կան 2 տասնյակ հանքային աղբյուրներ, որոնք հարուստ բաղադրություն ունեն և շատ առողջարար են: Աղբյուրներից երկուսը շշալցվում են: «Դիլիջան» և «Դիլիջան Ֆլորովա» հանքային ջրերն իրենց առողջարարական հատկություններով համարժեք են ֆրանսիական «Վիշի» և վրացական «Բորժոմի» հանքային ջրերին: Աղստև գետն իր վտակներով և բարձր, ծառածածկ լեռները քաղաքի բնապատկերին առանձին հմայք են հաղորդում: Սովորաբար Դիլիջանը համեմատում են շվեյցարական հանրահռչակ Դավոս առողջարանի և վրացական Աբասթումանի հետ: Քաղաքն ունի 3 թանգարան, գրադարանային համակարգ, գեղարվեստի և երաժշտական դպրոցներ: