Յելլ էքստրիմ պարկ - Լավագույն ժամանցի վայրերը Հայաստանում

Յելլ էքստրիմ պարկ

Տեղակայված լինելով Տավուշի մարզի Ենոքավան գյուղի գեղատեսիլ սարերում՝ Յելլ էքստրիմ պարկը անկրկնելի դրախտ է նրանց համար, ով ցանկանում է համատեղել ադրենալինն ու բնական միջավայրը:

Այն գրեթե հավասար հեռավորության վրա է գտնվում Երևանից ու Թբիլիսիից, ինչը հնարավորություն է տալիս ներգրավելու ամբողջ տարածաշրջանում բնակվողներին, մասնավորապես՝ արկածների ու բնության սիրահարներին: Ներառելով շուրջ 10 էքստրեմալ սպորտաձև՝ Յելլ էքստրիմ պարկը համարվում է տարածաշրջանի եզակի ու բացառիկ զվարճանքների համալիրը: Այստեղ կարող են այցելել բոլորը, քանի որ բացարձակապես չի պահանջվում պրոֆեսիոնալիզմի անհրաժեշտություն, լեռնագնացության տեխնիկայի տիրապետում կամ էլ հատուկ ֆիզիկական պատրաստվածություն:

YՊարկը սկսել է գործել 2015 թվականի հուլիս ամսին, երբ իրականացվել է առաջին թռիչքը Զիփ-լայնով: Այդ ժամանակ այստեղ կար միայն 3 զիփ-լայն: Հաջորդ տարիների ընթացքում, սակայն, զվարճանքների շրջանակն աստիճանաբար ընդլայնվեց, և էքստրեմալ միջոցառումները համալրվեցին նորերով: Այժմ այստեղ կարելի է նաև թռչել պարապլանով և հեծանիվ վարել լեռներում, ձիավարել, զբաղվել զորբինգով, ինչպես նաև հորիզոնական (Via Feratta) կամ ուղղահայաց լեռնագնացությամբ: 2016 թվականի ապրիլից այստեղ գործում է Rope Park, որտեղ կարելի է զբաղվել այնպիսի սպորտային տարրերով, ինչպիսիք են պարանով մագլցումը, խոչընդոտների շղթայի հաղթահարումը: Պարկում կարող եք նաև փորձել Ձեր ուժերը փեյնթբոլում կամ միանալ Off-road տուրին:

Առաջարկվող ծառայություններ

Զիփլայն

Զիփլայնը թույլ է տալիս էքստրեմալ զգացողությունների սիրահարներին ճոպանի և ձգողականության ուժի շնորհիվ հասնել մի կետից մյուսը: Առաջարկվում է զիփլայնի՝ 135-750մ երկարությամբ տարբեր ճոպանագծերով 6 թռիչքի հնարավորություն, որոնց բարձրությունը՝ 200-300 մ է: Մինչ թռիչքը տեղի է ունենում հատուկ թրեյնինգ՝անվտանգության կանոնների վերաբերյալ:

Պարանների այգի

Այգու ընդհանուր մակերեսը 3,000մ² է: Ընդհանուր առմամբ Rope Park-ում կան 9 տարբեր փորձություններ, որոնք իրենց մեջ ներառում են գերաններով և ճոպաններով տարբեր անցարաններ, ինչպես նաև ծառից ծառ փոքր զիփլայններով թռիչքներ: Պետք է պահել հավասարակշռությունը պարանների վրա, անցնել կամուրջների վրայով և մագլցել այլ խոչընդոտների միջով:

Ձիավարություն

Ձիավարությունն առօրյա կյանքից կտրվելու և Ենոքավանի գեղեցիկ տեսարանները, սարերի մաքուր օդը վայելելու հրաշալի տարբերակ է։ Արշավներն իրականացվում են 20 րոպեից մինչև 3 ժամ տևողությամբ՝ Ենոքավանի հարակից դաշտերում և սարերում։ Ցանկության դեպքում հնարավոր են նաև 7 օր տևողությամբ ձիարշավներ։ Մեկօրյա տոմսի մեջ ներառված է 10 րոպե ձիավարության տարբերակը։

Փեյնթբոլ

Փեյնթբոլը թիմային խաղ է, որի ժամանակ թիմերը պայքարում են տարածքում տեղակայված դրոշը գրավելու համար: Հաղթում է այն թիմը, որն ավելի շուտ է դրոշը գրավում: Զենքերը լիցքավորված են գունավոր հեղուկով լցված գնդակներով:

Զորբինգ

Մասնակիցը տեղավորվում է մեծ, թափանցիկ գնդակի մեջ, ամրացվում անշարժ դիրքով և գլորվում բարձունքից՝ 120 մետր երկարությամբ հատուկ նախատեսված ուղիով: Գնդակի մեջ միաժամանակ կարող են տեղավորվել երկու հոգի:

Պարապլան

Թռիչքն իրականացվում է փորձառու օդաչուի հետ միասին: Ծառայությունը ներառում է վիդեո նկարահանում և Երևանից տեղափոխում: Թռիչքներն իրականացվում են Սևանում, Ապարանում կամ Yell Extreme Park-ի հիմնական տարածքում:

Ենոքավան