Գրատպության թանգարան

Ի՞նչ կարող եք տեսնել Գրատպության թանգարանում

Գրատպության թանգարանը բացվեց Հայաստանի ազգային գրադարանում, քանի որ այն համարվում է հայերեն տպագիր նյութի ամենամեծ պահոցը: Թանգարանում առանձնահատուկ տեղ հատկացվեց հայ տպագրության գոհարների ցուցադրությանը: Հայ տպագրության պատմությունն արտացոլված է Գրատպության թանգարանի Գրի ակունքները, Հայոց այբուբենը, Հայ գրատպության առաջնեկները, Հայկական գրատպության սփյուռքը, Գրահրատարակչություն, Գրի հավերժությունը սրահներում: Գրատպության թանգարանում ներկայացված են արժեքավոր տպագրություններ և բացառիկ ցուցանմուշներ, այդ թվում՝ եվրոպացի հրատարակիչների գրքերում հայոց այբուբենի փայտափորագիր տպագիր ներկայացումները, էջեր Դենի Դիդրոյի «Հանրագիտարանից», մեկդարյա պատմություն ունեցող տպագրական մեքենաներ, մամլիչ, փայտափորագիր տախտակներ, կլիշեներ, Հայաստանի և Արցախի մամուլի եզակի նմուշներ, 19-րդ դարի վերջին քառորդի աթոռ-աստիճան, Հայ գրքի 500-ամյակի առիթով տիեզերք ուղարկված և վերադարձված հայկական մագաղաթ`Հակոբ Մեղապարտի տպանշանով, Ջորջ Բայրոնի ինքնագրով գիրքը, հմայիլներ, ապակետիպ և խմորատիպ եղանակով տպագրված գրքեր և պարբերականններ, «Արաքս» գրական գեղարվեստական պատկերազարդ հանդեսը, որը հարուստ բովանդակության և լավ տպագրության համար 1893 թ. Չիկագոյում արժանացել է «Կոլումբեան աշխարհահանդիսի մասնաժողովի» մրցանակին: Թանգարանում ցուցադրված է ինկունաբուլայի (խանձարուրային) նմուշ, Հարթման Շեդելի «Շեդելի համաշխարհային ժամանակագրությունը» գրքից 1 թերթ` հրատարակված Նյուրենբերգում` 1493 թվականին, ինչպես նաև քարտեզներ Սեբաստիան Մյունսթերի «Տիեզերաբանութիւն» (1580թ.) գրքից: