Կանգառ 1: 12:30
Հաղարծնի վանք

Միջնադարյան Հայաստանի հոգևոր ու մշակութային կենտրոն Հաղարծինը գտնվում է Դիլիջանից 12 կմ հեռավորության վրա՝ շրջապատված թավուտ անտառներով, հիասքանչ բնապատկերներով, ճարտարապետության ու բնության ներդաշնակության անկրկնելի օրինակ:
Հաղարծինի հուշարձանախումբը տեղադրված է բնակավայրերից հեռու, անտառապատ լեռներով շրջապատված սարահարթի վրա, այն ուշագրավ է համակառույցի մեջ մտնող ճարտարապետական բարձրարժեք հուշարձաններով և հարյուրից ավելի բազմաբովանդակ վիմական արձանագրություններով, որոնք հարուստ նյութ են բովանդակում միջնադարյան Հայաստանի սոցիալ-քաղաքական պատմության վերաբերյալ:
Հաղարծնի վանքի միաբանությունը Գոշավանքի, Հաղպատի և Վարագավանքի հետ միասին մասնակցել է երկրում կրթական գործի ծավալմանը և հայ եկեղեցու դավանանքը պահպանելու համար մղված երկարատև ու համառ պայքարին:
Պատմական աղբյուրները, սակայն, շատ աղոտ տեղեկություններ են տալիս այս նշանավոր հուշարձանախմբի մասին: Հաղարծնի վանքի կառուցման թիվը ստույգ հայտնի չէ: Հայտնի է միայն, որ 12-րդ դարի կեսերին այն արդեն գոյություն ուներ: Հաղարծնի վանքի հետ է կապված միջնադարի ակնառու գործիչ, առաքինի և գիտությամբ հռչակված, երաժիշտ Խաչատուր Տարոնացու անունը: Նրա առաջնորդության տարիներին ծաղկում ապրեց Հաղարծնի վանքը, կատարվեցին նոր կառուցումներ, բացվեց վանական նշանավոր դպրոցը: Մեծ երախտավորը վախճանվել և թաղվել է Հաղարծնում՝ Կաթողիկե եկեղեցու առջև:
Սուրբ Աստվածածին եկեղեցին վանքի գլխավոր և ամենամեծ եկեղեցին է՝ քառանկյունի հատակագծով, ներսից խաչաձև, ուղղանկյուն խաչթևերով շինություն: Երեսպատման քարերը կապույտ բազալտից և դեղին կրաքարից են:
Հաղարծնի վանքային համակառույցի բաղադրիչներն են նաև Սուրբ գրիգոր եկեղեցին՝ արտաքինից ուղղանկյուն, ներսից խաչաձև, ութանիստ թմբուկի վրա հանգչող ու սրածայր վեղարով պսակված գմբեթով, գավիթը կամ ժամատունը, Կաթողիկե եկեղեցին, Սուրբ Ստեփանոս եկեղեցին, սեղանատունը, թագավորական տապանատունը:

Կանգառ 2: 14:00
Յելլ Էքստրիմ Պարկ

Յելլ Էքստրիմ Պարկը գտնվում է Տավուշի մարզի Ենոքավան գյուղում: Որպես Հայաստանում էքստրեմալ զվարճանքների առաջին համալիր՝ այն հնարավորություն է տալիս զբաղվելու էքստրեմալ սպորտով առանց պրոֆեսինալ լինելու:
Առաջին Զիփ-լայն թռիչքը տեղի է ունեցել 2015 թվականի հուլիսին, իսկ մեկ տարի անց՝ 2016 թվականի հուլիսին, այցելուների քանակը գերազանցեց 5000-ը: Այդ ժամանակահատվածում էքստրեմալ միջոցառումները համալրվել են նորերով: Այժմ այստեղ կարելի է նաև թռչել պարապլանով և հեծանիվ վարել լեռներում: 2016 թվականի ապրիլից այստեղ գործում է Rope Park, որտեղ կարելի է զբաղվել այնպիսի սպորտային տարրերով, ինչպիսիք են պարանով մագլցումը, խոչընդոտների շղթայի հաղթահարումը, Զիփ-լայները: Այստեղ բոլորովին պարտադիր չէ ո՛չ լեռնագնացության տեխնիկայի տիրապետումը, ո՛չ էլ հատուկ ֆիզիկական պատրաստվածությունը:
Այստեղ գործում են նաև Paintball և Off-road տուրեր: Դուք կարող եք փորձել Ձեր ուժերը փեյնթբոլում, և եթե արագության մոլի սիրահար եք, ապա կարող եք միանալ մեր Off-road տուրին: Այն ներառում է ավտոմեքենայի կամ հեծանիվի արտաճանապարհային երթևեկությունը, գրունտային ճանապարհների, ինչպես նաև մանրախիճ ճանապարհային մակերեսների ու գրանիտե սալաքարերի հաղթահարումը: Այստեղ Դուք կարող եք նաև զբաղվել ձիավարությամբ: Հետագայում պլանավորվում է ջրային ատրակցիոնների գործարկում:

Յելլ էքստրիմ պարկում առաջարկվող ծառայությունների գնացուցակին ծանոթացեք այստեղ՝ https://yellextremepark.com/